1886 жылдың 26 шілдесінде Қазақ КСР Халық суретшісі, Қазақ КСР еңбек сіңірген өнер қайраткері Абрам Маркович Черкасский дүниеге келді. Киев көркемсурет училищесі мен Петербург Көркемсурет академиясының түлегі. 1915 жылы «Көктем» («Весна») картинасы үшін А.И. Куинджи атындағы сыйлықтың лауреаты атанды. 1935 жылдан бастап Киев көркемсурет институтының профессоры. 1937 жылы қамауға алынып, 1940 жылы А.М. Черкасский ақталды. 1941 жылы Алматы көркемсурет училищесіне сабақ беруге шақырылды. Үш жылдан кейін-ақ суретші өзінің жеке көрмесіне жүзден астам туындысын ұсынды. А.М. Черкасскийдің еңбектерінің ішінде «Өткен күннен сыр» («Рассказ о прошлом»), «Жамбыл Жабаев пен Дина Нұрпейісова», «Днепрдегі қасірет» («Трагедия на Днепре») картиналары, жазушы С. Мұқановтың, мүсінші И. Иткиндтің, Қазақ КСР Халық әртісі Қ. Бадыровтың, суретші Г. Ысмайылованың және т.б. портреттері, сондай-ақ көптеген пейзаждар мен натюрморттар бар. А.М. Черкасскийдің құжаттық материалдары ҚР Орталық мемлекеттік архивіне 1966 жылдың мамыр айында түсті. Қор құрамында шығармашылық қызметке қатысты құжаттар: суретші туындыларының репродукциялары, өмірбаянына қатысты материалдар, фотосуреттер және т.б. бар.